Komunikado di prensa
25 di sèptèmber, Amsterdam. E kaso legal ku ocho habitante di Boneiru i Greenpeace Hulanda a kuminsá kontra Estado Hulandes, ta sigui. Nan ta eksigí protekshon kontra kambio di klima i un redukshon mas rápido di emishon di gasnan ku efekto di broeikas. Awe, korte na Den Haag a dikta ku Greenpeace Hulanda ta atmisibel i por defendé interes general di Boneiru ku e kaso legal akí. Esei ta nifiká ku awor e kaso por kuminsá realmente. E promé seshon den korte lo tuma lugá otro aña.
Marieke Vellekoop, direktor di Greenpeace Hulanda: “Nos ta kontentu ku awor sí e kaso ta bai kuminsá realmente. Pero ta tristu ku esaki ta nesesario pa laga gobièrnu kumpli ku su propio palabrashonnan. Estado Hulandes no mag di midi ku dos midí, antó protehá e habitantenan di Boneiru ménos kontra e krísis di klima. P’e motibu akí nos ta entamá e kaso akí huntu ku 8 demandante di Boneiru, kende ya kaba ta enfrentando kalor diariamente pa motibu di kambio di klima. Pa evitá e pió konsekuensianan, nos ta eksigí pa Estado Hulandes redusí e emishon di CO2 na Hulanda mas rápido te na sero. Banda di esei, Boneiru mester ser protehá kontra e konsekuensianan di kambio di klima.”
“Ta birando mas i mas kalor, i bo ta ripará esei mas ainda den luna di sèptèmber, e luna di mas kalor di aña,” asina e demandante i kunukero Onnie Emerenciana na Boneiru ta bisa. “Mi mester di awa pa kultivá bèrdura, pero niun gota di awa no a kai pa hopi luna kaba. Asina’kí bo no por kultivá kasi nada. Asta e palunan grandi ta muriendo.”
“Te ku awor nos preokupashonnan no a ser skuchá,” asina e demandante Jackie Bernabela ta agregá. “E polítikonan di Den Haag a pasa serka nos vários biaha, pero despues nan ta bai i nunka mas bo ta tende algu di nan. Nos ta spera ku awor sí nan lo skucha nos na e otro banda na Den Haag, awor ku nos ta bai korte huntu ku Greenpeace. Mi ta kontentu ku awor porfin e kaso den korte por kuminsá realmente.”
Demandantenan individual den e kaso di klima
E kaso di klima di Boneiru kontra Estado Hulandes a keda entamá pa ocho habitante di Boneiru i Greenpeace Hulanda. Den e kaso, Greenpeace ta defendé interes general di tur habitante di Boneiru. E demandantenan individual ta biba òf a lanta na Boneiru. Den vários forma ya nan ta enfrentando e konsekuensianan di e krísis di klima, manera Helen, kende debí na e kalor mester sende èrko ku mas regularidat i p’e motibu ei e ta paga mas tantu na koriente. Òf e kunukero Onnie, kende debí na e sekura i kalor, awor por kultivá ménos. Nan a eksigí riba título personal pa Estado Hulandes protehá nan, pero korte a dikta ku e demandantenan di Boneiru no ta atmisibel i no por partisipá den e kaso komo partidonan den e proseso. Den kasonan di klima anterior, hues a yega na e mesun konklushon. Greenpeace awor ta pidi hues si e ocho demandantenan di Boneiru por deskribí nan situashon na hues komo testigunan den e kaso.
E testimonionan por eskrito di e 8 demandantenan individual ta keda un parti di e dosier di e proseso, meskos ku nan eksperensia personal ku konsekuensianan di kambio di klima na Boneiru. Greenpeace a hasi un petishon na korte pa duna kada un di e ocho demandantenan oportunidat pa papia durante di e kaso den korte.
Kaso di klima Boneiru
Na yanüari 2024, ocho habitante di Boneiru i Greenpeace a bai korte na Den Haag pa un maneho hustu di klima. Gobièrnu na Den Haag tin e deber di protehá tur su habitantenan kontra e konsekuensianan di kambio di klima, pero pa e habitantenan di Boneiru apénas tin plan pa tene nan sigur den e krísis di klima. Den e kaso di klima ta ser eksigí ku gobièrnu mester limitá e peligernan dor di redusí emishon di CO2 mas lihé. Ademas gobièrnu mester traha plannan pa protekshon di Boneiru. Den fin di aña binidero Estado Hulandes lo presentá su defensa kontra e dagvaarding di Greenpeace i demandantenan di Boneiru. Ta ser antisipá ku e seshonnan den korte lo tuma lugá otro aña. Greenpeace ta ser asistí den e kaso di klima akí pa un tim di abogado di e ofisinanan di Kennedy van der Laan i Prakken d’Oliveira Human Rights Lawyers.
Michael Bacon, abogado na Kennedy Van der Laan: “ta lamentabel ku korte a dikta ku e demandantenan individual no ta atmisibel. E demandantenan aki sigur lo keda involví den e kaso, ya hues por skucha ki impakto di kambio di klima ya kaba tin na Boneiru. Estado Hulandes mester hasi mas pa protehá su suidadanonan kontra kambio di klima.”
Ya tin mas ku 35 mil simpatisante
Riba e wèpsait di Greenpeace bo por bira un simpatisante den e kaso di klima kontra di Estado Hulandes. Di e manera akí, bo ta respaldá e importansia di e kaso di klima i ta eksigí pa Hulanda redusí emishonnan di CO2 mas lihé i tuma medidanan konkreto pa Boneiru. Mas ku 35 mil persona na Hulanda Oropeo i Boneiru a firma kaba.