Dia 11 di yanüari 2024, ocho habitante di Boneiru huntu ku Greenpeace Hulanda ta demandá Estado Hulandes. Nos gobièrnu tin e obligashon di protehá e derechonan humano di tur hende di Hulanda, pero no ta hasiendo esaki aktualmente pa e habitantenan di Boneiru. Enbes di protehá nos tur kontra e krísis di klima, e gobièrnu ta pone ganashi i kresementu ekonómiko na promé lugá. Pa e motibu ei Helen Angela, Jackie Bernabela, Judmar Emerenciana, Onnie Emerenciana, Danique Martis, Daniela Simal i Angelo Vrolijk huntu ku Greenpeace Hulanda ta bai korte. Nos ke hustisia di klima.
Hendenan na Boneiru ya ta eksperensiando e konsekuensianan di e krísis di klima. E nivel di laman ta subiendo i e temperatura ta oumentá. Si no redusí e emishonnan di manera drástiko, un kinto parti di Boneiru ta kore peliger di bai bou di laman promé ku fin di e siglo.
Nos ta kana den marchanan pa klima, ta tuma akshon, ta firma petishonnan i den hopi kòmbersashon nos a pidi pa akshon pa klima, antó tòg ketubai gobièrnu ta nenga di hasi loke ta nesesario. Despues di a konsultá ku sientífikonan di klima, huristanan i habitantenan di Boneiru, nos sa sigur: un kaso den korte ta loke ta nesesario awor p’asina e gobièrnu bini ku un maneho hustu di klima. Awor ta keda na korte pa husga tokante e deber di e Estado Hulandes, independientemente di ken ta sintá den Torentje.
Hustisia di klima awor!
Boneiru a ser lubidá ya pa demasiado tempu. Ounke Boneiru ta un munisipio Hulandes, gobièrnu ta trata e habitantenan di Boneiru ketubai manera ku nan ta ménos importante ku e resto di nos. Pa e motibu ei nos ta eksigí hustisia di klima. Gobièrnu mester sòru pa e emishonnan di CO2 baha hopi mas lihé, p’asina nos por mantené e kalentamentu mundial bou di 1.5 grado. Esaki ta vital pa nos tur.
Ademas, pa Hulanda Europeo tin un Strategia di Adaptashon Klimátiko, un Plan Delta i un Programa di Awa. Tur tipo di plan i medidanan pa protekshon kontra e subida di nivel di laman i otro konsekuensianan di e krísis di klima. Pero pa Boneiru esakinan no ta eksistí.
I esaki, miéntras e investigashon detayá di Vrije Universiteit Amsterdam (VU), riba enkargo di Greenpeace, ta mustra ku promé ku fin di e siglo akí ya un kinto parti di Boneiru por inundá kaba. Durante tormentanan, e riesgo di inundashon ta oumentá ainda mas. Esaki ta hasi kayanan inaksesibel i servisionan inalkansabel. Dor di esaki hendenan lo no por bai nan trabou òf por ehèmpel hospital, i muchanan no por bai skol. Tambe e isla lo konfrontá oumento di kalor i e morto di koralnan. Esei ta afektá e salú di hendenan riba e isla, kendenan ademas ta kore riesgo di pèrdè nan trabou, nan tera i herensia kultural importante. E hendenan ta riparando esaki awor kaba.
Nos tur tin derechi riba protekshon di nos ambiente i nos manera di biba. Esnan mas hóben tambe ke i mester por keda biba gewoon na Boneiru. Ta opvio ku gobièrnu Hulandes no ta tuma e responsabilidat pa protehá hendenan na Boneiru. Tempu ta pèrta. Nos no tin otro opshon ku bai korte.
Kiko boso ta eksigí?
E investigashon di VU ta suprayá ku gobièrnu mester hasi tur kos den su poder pa limitá kambio di klima mas tantu posibel. Pa futuro di Boneiru ta krusial pa limitá kalentamentu mundial te bou di 1.5 grado, ku ta e límite ku a ser palabrá den e Akuerdo di Klima di Paris. E konsekuensianan lo ta serio ketubai, pero e riesgonan mas grandi lo por ser evitá. P’e motibu ei nos ta eksigí prinsipalmente dos kos den e dagvaarding:
- Plannan i medidanan konkreto, desaroyá ku partisipashon di habitantenan, pa protehá Boneiru kontra e konsekuensianan di kambio di klima.
- Gobièrnu mester kontribuí ku su parti hustu na e meta mundial pa tene e kalentamentu bou di 1.5 grado. Investigashonnan sientífiko ta mustra ku, si tene kuenta ku e emishonnan históriko di gasnan ku efekto di broeikas, Hulanda no tin mag di saka niun emishon mas for di awor. Pa e motibu akí Hulanda mester redusí su emishonnan te na sero mas lihé posibel. Diferente investigashon ta mustra ku ta posibel i alkansabel pa redusí e emishonnan na Hulanda te na sero pa mas tardá na 2040. Tanten ku Hulanda no a baha su mes emishonnan te na sero, e mester kompensá esaki dor di yuda otro paisnan pa redusí nan emishonnan. Esaki ta establesé tambe den e Akuerdo di Klima di Paris. Pues esaki ta nos eksigensia tambe.
Dikon nèt awor, kiko a sosodé promé?
Dia 11 di mei nos a manda un ultimatum pa promé minister Rutte. Den e sommatiebrief akí nos a eksigí kaba pa gobièrnu protehá Boneiru. Esei tabata e último atvertensia na gobièrnu pa redusí emishon di CO2 rápidamente i tuma medidanan konkreto pa mantené Boneiru sigur. Awor i den futuro.
Den herfst di 2023 ainda a tene kòmbersashonnan ku representantenan di gobièrnu Hulandes i ámtenarnan, kaminda tambe e abogadonan di e demandantenan tabata presente. Nan a suprayá e urgensia di e problema di krísis di klima i tambe a dal algun paso chikí. Manera por ehèmpel e kompromiso ku lo a bini un asina yamá klimaattafel i ku pa esei lo a pone sèn disponibel den e próksimo lunanan. Sinembargo, gobièrnu ta keda hala e responsabilidat for di dje, i e diferensia ku Hulanda Europeo ta keda sumamente grandi. E demandantenan no a haña siguransa (ni perspektiva) di trato igual. Nan tin mester di siguransa ku e medidanan nesesario pa protehá nan lo ser tumá, ku esaki lo sosodé a base di informashon korekto, investigashon i prosesonan di partisipashon, i ku lo tin medionan finansiero disponibel riba término largu. Ku otro palabra: e mesun trato i protekshon ku e habitantenan di Ameland, Valkenburg òf kualke otro munisipio por konta kuné.
Kiko ta sosodé riba e dia di e dagvaarding?
E dagvaarding a ser hibá na korte dor di un kantidat di hende, entre otro representantenan di e movementu di diáspora Karibense, klima i anti-rasismo. Nan a kana den un marcha simbóliko di protesta for di Torentje pa Korte na Den Haag.
Un di e demandantenan, Kjelld Kroon (28), tambe a kana den e marcha. El a deklará: “Kambio di klima ta den ‘full swing’ na Boneiru. Ta birando mas i mas kalor i tin yobida di awa mas frekuente i tambe mas ekstremo. E yobidanan fuerte akí ta kousa inundashon, ku ta pone hopi kas bai bou di awa. E kas di mi mama tambe. E tempu di papia a pasa, nos mester tuma akshon. Mi no ke warda mas i ta pa e motibu ei mi ta akshoná awe.”
E otro demandantenan ta Helen Angela, Jackie Bernabela, Judmar Emerenciana, Onnie Emerenciana, Danique Martis, Daniela Simal i Angelo Vrolijk.
Greenpeace Hulanda tambe ta un demandante. Durante entrega di e dagvaarding na Den Haag e demandantenan a tene un rueda di prensa na Boneiru. Andy Palmen, direktor di Greenpeace Hulanda a bisa: “No mester importá si bo ta biba na Boneiru, na Ameland òf na Valkenburg. Ta e deber di gobièrnu Hulandes pa protehá nos tur kontra e konsekuensianan di e krísis di klima. Boneiru ta ser afektá gravemente pa e subida di nivel di laman, e kalor i e desaparishon di e koralnan. Gobièrnu tin e deber di limitá mas tantu posibel e kalentamentu mundial i aktualmente no ta kumpliendo ku esaki. Nos ta eksigí pa Boneiru ta mihó protehá i ademas pa gobièrnu Hulandes redusí e emishon di CO2 pa henter Hulanda mas lihé. Esei ta na interes di nos tur.”
Kiko mi por hasi?
Bo ke sostené e demandantenan? Awèl pone bo firma akinan. Dor di pone bo firma solamente un biaha, nos ta laga esnan den polítika i e hues mira ku nos eksigensianan por konta ku un sosten amplio di komunidat.