Kambio di klima ta menasá na dal Bonèiru hopi duru. Por kousa di esaki gobièrnu di Bonèiru a tuma inisiativa pa lanta un mesa di klima na Bonèiru. A pidi pa Ministerio di Asuntunan Ekonómiko i Klima i ‘kwartiermaker’ Ed Nijpels yuda Bonèiru ku esaki.
Greenpeace ta kontentu ku tin mas atenshon pa e konsekuensianan di kambio di klima. Meskos ku algun otro organisashon, nos a haña un invitashon pa un diálogo ku Ed Nijpels, e ‘kwartiermaker’ pa e mesa di klima pa Bonèiru. Nos a papia kune un biaha na Hulanda i tambe ora e tabata na Bonèiru. Den e diálogonan aki nos a enfatisá e siguiente puntonan:
- Habitantenan di Bonèiru mester ta bon enbolbí den e plannan i e proseso di e mesa di klima.
- Tur loke ta tratá na e mesa(nan) di klima mester ta transparante.
- Plannan pa protehá Bonèiru (‘adaptatie’) mester ta trahá huntu ku e habitantenan di Bonèiru í basá riba noshonnan sientífiko.
- Hulanda mester hasi aun mas esfuerso pa redusí emishon di gasnan ku efekto di ‘broeikas’ mundialmente mas lihé (‘mitigatie’).
E kombersashonnan ku tabatin te na momentu aki na Bonèiru no ta krea e impreshon serka nos ku a tuma e puntonan aki na serio. Nos ta preokupá ku esaki por kousa ku no tin un sufisiente base di sosten di hendenan na Bonèiru. Nos ta spera ku den e kuestion aki nan lo prueba nos robes i tuma nos puntonan den konsiderashon.
Nos sa pa desénas ku kambio di klima ta forma un riesgo grandi pa Hulanda, no ta importá si bo ta biba na Ameland, Bonèiru of Valkenburg. E urgensia pa tuma akshon rapido ta oumentá. Pues ta importante pa e mesa(nan) di klima aki ta un logro. P’esei mester enbolbí habitantenan di Bonèiru, asina ta yega na solushonnan ku ta fungi pa Bonèiru.
Kon e mesa di klima lo resultá awor aki no ta masha kla. ‘Kwartiermaker’ Nijpels ke trese un konseho dilanti prome ku fin di aprel. Nos ta interesá pa mira ki e siguiente pasonan lo ta. E urgensia akí ta bon, pero Bonèiru meresé pa ta enbolbí na un manera hustu.
Meralney Bomba,
Mobilisadó di komunidat Bonèiru