人貓相連影響生命 文地貓：鍾意就會堅持
見畫如見人，與本地著名插畫家文地貓做訪問，真人與筆下主角一樣佻皮，影相甫士多多之餘更即場「爆肚」，為綠色和平「無塑海港」重用杯創意設計比賽構思口號：「發揮你嘅想象力，為環保出少少力，一齊嚟參加啦！」
今次為比賽設計宣傳海報並擔任評審，她說希望發揮人貓相連的力量，傳遞保護海港訊息──生命影響生命，「老土」得來卻是由衷心底話。
文章目錄
「回收唔係最好方法」
走進文地貓工作室，第一眼便見她拿着環保水杯，在 mandycat office 實踐減廢，但要做到她眼中的「環保小先鋒」諸如自攜杯出街，也坦言有一定難度，「有時癮起想飲杯咖啡，用完即棄係會有罪惡感，因為每買一杯就多咗個廢物。就算洗乾淨回收，都唔係最好方法。」
即棄塑膠無處不在，唯有盡量在生活細節中努力，得悉「綠色和平重用杯借還計劃」與初創企業研發手機程式，連結全港 36 間咖啡店提供借還杯服務，「用 App 借杯梗係好！而家人人手機隨身，如果我真係唔記得帶杯，唔想增加廢物，即刻用 App 都非常方便。」
「框架下發揮爆發力」
「（設計）有好多角色，人貓人貓相連住，就咁望落去好似手拖手，有種連繫嘅感覺。但仔細睇其實佢哋係拎住重用杯，一個傳一個，重用！重用！重用！」重要事講三次，皆因文地貓的重用杯設計圖樣除了呈現資源共享理念，鼓勵公眾以重用代替即棄，亦與其創作心得一脈相承。「訊息就係一個傳畀一個，生命影響生命，重用杯其實都係呢個意念。」
投身全職創作多年，文地貓仍然「有種喜悅喺度」，每當讀者反映喜歡其作品或得到共鳴，就會感到滿足，問及會否繼續畫下去時也答得堅定，「其實好簡單，鍾意就會堅持，堅持就會鍾意。」
當興趣變成職業，會感受到框框嗎？文地貓看見的不是限制，反而是探索、接觸更多的機會，亦藉此鼓勵參賽者發揮想象力，帶出比賽訊息：「創作最得意嘅地方，唔係無窮無盡任你去玩，而係你可以喺某個框架下發揮到創作力、爆發力、想象力，傳達番個訊息。」
🐾給貓奴的環保小貼士🐾
文地貓的身份，除了插畫家和"Unicorn"（Jeremy 李駿傑 fans），當然也是「貓奴」一名。要侍候主子，縱難完全避免接觸即棄塑膠，文地貓也有 3 個減塑小貼士分享：
🐾 罐罐：撕掉招紙，洗乾淨後拿去回收
🐾 貓砂：使用木貓砂，可直接沖進馬桶
🐾 尿墊：盡量使用可分解材質的尿墊
「還原靚靚海港就好啦」
除了與多媒體藝術家葉蘊儀、環保繪本小畫家簡鏡倫及綠色和平減廢項目主任 Leanne 擔任評審，文地貓亦包辦比賽宣傳海報設計：海港背景之上，一隻繪製中的貓貓「嘜頭」重用杯，也寄託了她保護美麗海港的心願。「我本身係好鍾意大海，而我哋製造咗好多廢物，影響到海港環境，其實都好傷心。」
「如果重用杯能夠還原番我哋靚靚嘅海港，咁就好啦！」
一人一個重用杯創意設計，一起推廣「重用杯借還系統」和全城走塑理念，讓下一代仍能享受和見證這片蔚藍海港的醉人景色。立即參加比賽！
「無塑海港」重用杯創意設計比賽評審專訪：