【重用杯專訪】自比 Café 界林超英 潮人設計師品味、環保全都要

【綠色和平重用杯借還計劃│參與咖啡店專訪】香港天文台前台長林超英對不開冷氣的堅持，向來別樹一幟，「其實我都係一個林超英嚟嘅，今年（喺屋企）開咗唔夠 3 日冷氣」。

位於上環的洗衣咖啡店「Coffee & Laundry」有位型格設計師店主 Katol ，打理副業一樣走在潮流尖端，幾年前推出過自家重用杯，如今捲土重來參與重用杯計劃，「唔係支持（環保），只係覺得應該咁做。亦唔係諗要保護環境，只係唔好傷害個地球。」我行我素，同樣可以功德無量。

曾推自家重用杯 再接再厲加入借還網絡

木框鋪面、黑白格仔地板、樽裝 cold brew 印上著名插畫家作品，見店如見人，反映 Katol 的鮮明風格，「我成日要留喺鋪頭，冇理由設計一間我唔鍾意嘅」。講到重用杯應用程式與杯身設計，他的創意頭腦亦隨即運轉起來：錄製更讓人愉悅的掃 Code 聲音？像打機育成經驗值般展示節省即棄杯總數？

想法多多，或許亦汲取過店鋪 2019 年推出自家重用杯的「教訓」──當時顧客只要 $50 按金，便可帶走重用杯並隨時歸還，惜計劃營運半年左右，約 50 個杯便「下落不明」。今次加入綠色和平重用杯借還計劃，Katol 認為系統較完善值得再試，顧客反應更喜出望外──訪問當日咖啡師 Harbie 積極介紹，便令兩位客人即場借用！

避談保護環境 我說的其實是……做人準則

稱得上 Café 界林超英，當然不只少開冷氣咁簡單。Katol 很少把「環保」兩字掛在嘴邊，「唔係支持（環保），只係覺得應該咁做……我成日同朋友講，你時刻開住冷氣，就唔可以怪冇冬天」；甚至對類似標籤帶點抗拒，「（好鍾意大自然）又唔係，而係覺得所有嘢都係平等，就算我食素（8年），都係因為所有嘢：螞蟻、狗、豬係平等，冇理由𡁻咗佢。」

「咁做人都有個準則，同設計一樣，人哋做得差，唔代表我又要做得差。」每日借出幾隻重用杯，看似談不上甚麼環保大義，但 Katol 這種應做、盡做的態度，或許更能化解掙扎，順其自然繼續做：「你做咗就係做咗 ，唔會話做少就係冇做，亦唔係話冇成效就放棄，咁以後就冇人再做。可能今次你發現有咩唔好，下次做好啲囉」。

感謝各界關注及支持，綠色和平「重用杯借還計劃」現已擴展至全港更多地區，與 36 間咖啡店及連鎖咖啡店合作，並推出「借CUP重用 即給獎賞」推廣活動。

立即下載手機應用程式 #ch00ze，按指示每借用 1 次重用杯買飲品，即可儲 Beans（積分）換領獎賞！（按此瀏覽計劃詳情）

【綠色和平重用杯借還計劃│參與咖啡店系列專訪】
Beyond Coffee & Bar：留下來的文藝咖啡店 人生下半場交織環保夢
CLEAN：轉牛奶、即棄杯加 $2 西營盤小店 hardcore 中對話
墨麒麟：因親近而珍惜 坪洲「咖啡佬」的環保進化史
Espresso Remedy/The Tiny Island/今半啡 Meanwhile/Cupping Room/Green Door/Knead：上環重用杯借還新嘗試 點解 6 間咖啡店肯支持？