洪永城的亞馬遜遊記：十年後雨林還在嗎？
所謂旅行，除了跨越空間的距離，也是凝住時間的流逝──有些風景，下次到訪可能已不復存在？
旅行達人洪永城（Tony）疫情後首次主持旅遊節目，捨棄報復式食玩買，毅然遠征 17,000 公里外的巴西亞馬遜雨林，為自己「Tony 的地球」補完這片綠色大地氈，並傾聽當地民眾各盡所能保護環境的故事。與其目送森林十年後或茂盛不再，他希望大家趁還來得及時一起行動，守護亞馬遜。
文章目錄
「好想呢片綠色地氈永遠喺度」
Tony 有多喜歡旅行？足跡踏遍北韓、古巴、伊拉克等地，疫情期間不惜睇「虛擬旅遊」 4K 影片止癮，以致當他年初提出要完成 bucket list 上到亞馬遜一遊的心願，即使家人、朋友詫異或反對，仍決定滿足抑壓已久的出走欲望。「大部份人對亞馬遜嘅感覺，都係從電影而嚟，第一時間會聯想到危險同恐懼：大蟒蛇會吞咗你，鱷魚、食人魚會扯你落河……或者會問，點解你要『虐待』、『折磨』自己？」
經歷兩星期完成拍攝 10 集旅遊節目《阿媽唔信我去亞馬遜》（6 月 12 日起逢星期一至五晚上 10 點半於 J2 播出），他坦言亞馬遜周邊區域也有商業化一面，反而意想不到這裡仍是 3,000 多萬原住民及居民的家園，倚賴雨林的植物、藥材等自然資源維生，「最估唔到咁多人咁鍾意亞馬遜──呢 3,000 幾萬人，甚至巴西唔同城市嘅人，你都感覺到佢哋好想保護、愛惜呢個環境，令呢片『綠色地氈』永遠喺度。」
致留下來、蹈火海的人
喜愛旅行的人，或許也是喜歡聽故事、說故事的人──Tony 捧起他的啡色筆記本，為我們娓娓道來旅途中最難忘的兩個故事。其一是製作團隊拜訪瑪瑙斯（Manaus）一個定居亞馬遜河畔船屋的家庭，問那位孩子的媽媽為何留守此地，原來她想將自己與亞馬遜的情感連繫傳承後代，讓小朋友把握每分每刻，感受雨林之美，「而家我哋喺度玩緊，但可能幾公里外已經有人斬緊樹。佢好驚將來呢片雨林會完全消失，『綠色地氈』會變咗咖啡色。」
另一次是他們跟隨一支消防志願軍深入亞馬遜雨林，比官方隊伍來得更機動，協助遏止森林大火；Tony 更即席舉手投足示範整個過程：挖坑截斷火線、同步噴水及撲火，最後出動大型吹風機，控制火勢不致蔓延。不過，原來那位救火隊長曾因義舉被捕，更曾淪為階下囚，無非因為開闢林地與伐木及畜牧業的利益千絲萬縷。
「但佢要堅持佢鍾意嘅嘢，（出獄後）仲成立呢個義工團體。有人願意犧牲自己嘅時間同人生，去救呢個雨林，呢件事係好偉大。」
齊來守護 最重要的 Amazon
旅途期間，Tony 在社交平台寫下感言：「你可以試吓喺 Google 打 Amazon ，所有所有，只會顯示買嘢嗰個，而唔會係我哋最重要嗰個。」食字背後，他說這關乎大眾是否願意還原根本，反思究竟是血拼購物，抑或空氣、土壤、大自然才更重要，也特別提醒自己拍攝這輯節目的小小任務，希望傳遞亞馬遜雨林的重要性，「令大家多啲認識，繼而將來做番少少嘢，幫助呢個地方」。
縱使千里迢迢，Tony 認為生態循環彼此牽連，你我仍有很多事情可以幫助守護亞馬遜雨林，包括關注雨林相關新聞、留意肉類等產品來源是否取自破壞森林，也鼓勵大家捐助支持守護亞馬遜森林與原住民權益多年的綠色和平，「我知道綠色和平由畜牧、斬樹到採礦，都會做好多研究報告，阻止企業破壞亞馬遜，亦喺新聞見到佢哋成功促使企業停止使用嚟自亞馬遜嘅皮革，或者喺雨林種植大豆，幫到亞馬遜好多。」
初為人父，身份多了一重，Tony 依然是那位 travel guru ，期盼來日帶女兒一起探索世界，也願亞馬遜常綠長青，讓奇妙故事繼續說下去：「我會帶佢多啲去大自然，感受呢個地方有幾靚、有幾珍貴。」
「地球係好美麗，但你需要去保護，所有嘢唔係理所當然喺你面前出現。」