【專訪】緩減酷熱天氣 望頑張跑下去 Kolor主音Sammy：萬事起頭難 但有心不怕遲

卸下結他，戴上太陽眼鏡，香港樂隊 Kolor 主音蘇浩才（Sammy）身披「頑張」跑會戰衣，在烈日當空下起跑。見他堅守方向如刀，原來十多年前也曾感到極迷惑與負荷，接觸跑步後才煉成愚公終不倒的精神，即使面對極端天氣屢破酷熱紀錄，也決心鼓勵更多人齊來合作堆建氣候屏障，抵擋風吹雨打。

「係跑步令我知道萬事起頭難，但冇嘢係做唔到㗎。無論係自己身體，或者係嗰環境啦，冇嘢係太遲。」

從一個圈跑到13年

就像熱血漫畫開頭，Sammy 曾經過着日夜顛倒的生活，食煙、夜瞓瓣瓣齊，但這顆「萬大事怎麼策劃 不須講得太多」的了不起搖滾魂，面對身心相繼響起警號，便聽從醫生建議嘗試接觸運動，選擇了毋須太多預備、身邊又有伴同行的跑步，「開頭跑運動場，一個圈都跑唔到，但我個人性格覺得一定要征服佢，就開始迫自己每日去跑」。

由米到公里、由日、月到年，十三年跑齡就此一步步累積，如今已融入生活成為日常，全因跑步之於他有多重意義。最基本固然是促使自己調整作息，才能保持每日跑下去；治癒身體之餘也是心靈良藥，鍛煉出堅持與信心，「跑步都係一種精神上嘅藥物，令我有個好嘅心態去矯正一啲唔好嘅習慣」。跑步甚至擔當音樂創作的靈感泉源，以及羨煞旁人的「閃光彈」。「譬如我同我太太嘅感情啦：運動訓練其中一樣嘢就係你要唔怕辛苦，變相好多嘢都唔會再咁執着，容易啲放得開；運動又令到我哋話題多咗，或者大家喺溝通、相處上輕鬆咗。」

畢生難忘 43°C的黃金泳灘

逆走過 100 公里的麥理浩徑，完成過六大馬拉松之二，跑步確實是「無需貪快 未來或面臨暴曬」的藝術，但套用在極端天氣，暴曬、酷熱不再是「未來」，而是已在當下襲來。例如青山公路是 Sammy 每日跑步必經之路，沿途卻有不少位置無遮無掩，炎熱程度教他自比煎蛋或煎Pan上面的一塊肉，連母親也會憂心直說「好熱呀，你仲出去跑？」

最深刻一課，是他去年為了備戰撒哈拉沙漠馬拉松的半程版本 Half Marathon Des Sables，特意在香港黃金泳灘進行熱適應訓練，「望住沙灘上個溫度計，係 39°C 先嘅，再跑咗一陣已經變咗 43°C，我哋頂唔順就停止咗訓練。見住個溫度計係咁飆，係我畢生難忘嘅一課。」

一次半次尚可停步保平安，但當香港以至全球屢破高溫紀錄，Sammy 舉例部份海外比賽在七、八月舉行，意味跑者無可避免要在四至六月炎熱環境下刻苦訓練。「呢幾年係早咗熱，對訓練係一個好大嘅負荷。唔係個個捱得到，而且新聞都睇到真係好多人會出事。」

「我有幻想過，香港會唔會變四十幾度呢？其實開始慢慢見到，真係發生緊。」

創立頑張跑會 「起碼改變自己先」

「如果因為酷熱天氣而冇得再出街跑，我覺得係好可惜。」在 Sammy 眼中，街跑包含適應路況起伏、天氣變幻，才是實測跑步能力的地方，並非健身室所能代替。因此由他與教練朋友阿歹兩年前成立的「頑張」跑會，每周在運動場以跑會友，向沒有跑步習慣的人推廣跑步──取名自 2012 年"Law of 14"作品之一《頑張》，「由原點 再進跑道 望着標板的里數」仿如神準預言，只是如今毋須再「獨個去對抗碉堡」，因為身旁已有一班好跑友共同進退。

「有啲嚟跑嘅人同我講，自己有少少抑鬱，希望可以透過跑步令個人開心啲，之後識到其他理念相近嘅人一齊跑，做到好朋友亦都開心咗；亦有啲人連運動褲、跑鞋都冇，但原來佢唔知自己有好大嘅跑步潛能，慢慢去練比賽又跑到好成績。」由最初十個八個到最多百幾二百人出席，Sammy 形容見證跑友各種改變，猶如「睇住仔女出人頭地嘅一日」倍感安慰；而這股頑張精神，也體現於他不時與身邊親友分享環保訊息，鼓勵更多人關注氣候變化，關注我們共踏征途的地球。

「無論同跑會嘅人、隊友、屋企人傾偈，我都會盡量帶起呢啲訊息，畀大家知道就算感覺上力量係微不足道，其實我哋都可以做到啲嘢。」

「呢個世界太多嘢改變唔到，但最起碼我可以改變自己先，呢樣嘢係運動畀我一個最大嘅提醒。」

「逃不來別咬著牙 已戰勝懼怕」

既是跑手也是樂手，當中可有殊途同歸、異曲同工之妙？Sammy 直言近年確實因為運動，啟發了一些音樂創作上的轉變，包括意念、歌詞等，「我覺得呢幾年裏面我哋嘅作品，慢慢開始令更多朋友對生活、對自己有一啲反思，喺音樂上如果做得到呢件好事，我都會繼續做！」

他也特別為今次訪問「點歌」作結，在云云作品中挑選了 2023 年的一首《無需要理由》：「寧休息不退下，迎北風一笑，逃不來別咬着牙，已戰勝懼怕。」

「每個人總會有好多自覺冇能力、好害怕嘅事，但其實好多困難你衝破咗、捱過咗之後，都係一片天嚟嘅，總係會有個出口。」