Ō mātou uara
E whakapono ana mātou, ka piki anō te ora ki te ao, waihoki, kua tīmata kē tōna whakarauoratanga mai. Nā te wairua toa o te takitini huri noa i te ao, kua puare mai te ara ki te oranga pūmau o te taiao me te rangimārie.
![](https://www.greenpeace.org/static/planet4-aotearoa-stateless/2022/12/bf7370ce-gp0stqx0a_treated.jpeg)
Ā mātou mahi
E tū motuhake ana a Greenpeace hei rōpū whakahau e whai ana i ngā tūmahi tohe mārire, auaha hoki, ki te whakaatu atu i ngā raruraru o te taiao huri noa i te ao. Kei te kōkiri hoki mātou i ngā whakautu tōtika, kia mātua whai hua te taiao, kia tau hoki te rangimārie ā ngā rā ki tua. Kei te whai a Greenpeace ki te whakapūmau i te kaha o Papa ki te poipoi i ngā momo koiora katoa. Nā reira, kei te mahi a Greenpeace: – ki te whakamarumaru i ngā momo koiora rerekē me ōna āhuatanga katoa, – ki te aukati i te pokenga me te tūkinotanga o te moana o Tangaroa, o te whenua me te wai māori – ki te whakamutu atu i ngā mahi whakawetiweti a te riri kariri, ki te whakatairanga i te rangimārie, i te whakarerenga atu o ngā rākau o te riri me te noho riri-kore.
Ō mātou uara matua
Ko te haepapa whaiaro me te tū riri-kore. Ka tū ake mātou i runga i te whakaaro nui. Ko te tikanga o tērā kōrero, nō mātou anō te kawenga o ā mātou ake mahi, arā, ko te haepapa whaiaro tērā. E pūmau ana mātou ki te rangimārie; ka whakangungua ngā tāngata katoa e whai wāhi ana ki ngā tūmahi mātātoa a Greenpeace ki ngā tikanga motuhake o te tū riri-kore.
Tū motuhake. E kore rawa mātou e whai pūtea i ngā kāwanatanga, i ngā kāporeihana me ngā rōpū tōrangapū. Ka whai pūtea mātou i ngā takoha a te tangata takitahi me ngā tono pūtea o ngā momo whakahaere hua-kore anake.
Ehara i te mea he hoa pūmau, he hoariri mauāhara rānei a Greenpeace. Ki te hiahia tō kāwanatanga, tō kamupene rānei ki te whakarerekē i ā koutou mahi, ka mahitahi mātou ki a koe ki te whakatutuki i ō whāinga. Ki te hapa anō koutou, ka hoki atu anō mātou ki a koe. E kore e tutuki mā te kupu, engari anō te mahi.
Te whakatairanga whakautu. Ehara tā mātou mahi i te whiuwhiu heitara noa; ka whakawhanake, ka rangahau, ka whakatairanga mātou i ngā tūmahi tūturu kia whai hua te taiao, kia tau te rangimārie ki runga i a tātou katoa.