Te Poari me ngā Mahi Whakahaere a Greenpeace Aotearoa
Ko tētahi o ngā tino pūkenga o Greenpeace, ko tō mātou kaha ki te whakatutuki i ā mātou mahi huri noa i te ao, i a mātou e whakahaere ana i ngā tari ā-motu me ngā kaupapa taiao i raro i ngā āhuatanga e tika ana mō te whenua e nōhia ana e mātou. He mea nui ngā mahi whakahaere a Greenpeace e tutuki pai ai ā mātou kaupapa whakahau huri noa i te ao, waihoki i Aotearoa nei. Ka mahitahi te Executive Director me ētahi atu kaiwhakahaere matua o Greenpeace Aotearoa ki a Greenpeace International me ō rātou hoamahi ki whenua kē ki te whakawhanake, ki te whakatinana hoki i ngā rautaki me ngā mahere o te ao. Ahakoa he whakahaere motuhake a Greenpeace NZ, me hāngai tonu ngā kaupapa whakahau, ngā mahi kohi moni me ngā whakahaere ki te anga whakahaere me ngā kaupapa here kua whakaaetia e ōna whare huri noa i te ao. Ka pōtihia te Poari o Greenpeace Aotearoa e tētahi Huinga Pōti, arā, kia 35 ngā kaitautoko o Greenpeace Aotearoa, kia rima ngā kaimahi nō ngā tari o Greenpeace, ā, kia 10 ngā kaimahi o mua o Greenpeace NZ kua roa ake i te kotahi tau e noho ana ki waho atu o te tari. Tokoono ngā kaihautū o te Poari, ā, ka pōtihia rātou ki te Hui ā-Tau, e toru tau te roa o ō rātou tūranga. Ko tā rātou mahi, he whakaū i ngā whakahaere kia whaihua, kia tika hoki ngā mahi, i raro anō i ngā whāinga a Greenpeace. E noho ana ngā whakahaere o te whare ki raro i te Greenpeace Aotearoa Executive Director, arā, i a Russel Norman. Ko tāna, he tuku pūrongo ki te Poari, nā rātou anō ia i whakatū. He whakahaere motuhake, he whakahaere hua-kore a Greenpeace New Zealand Incorporated nō te kāhui nui tonu o Greenpeace International kei Hōrana me ngā tari e 28 huri noa i te ao.
Te Poari Whakahaere o Greenpeace Aotearoa
Russel Norman – Executive Director
Ko Russel tētahi o ngā reo matua o Aotearoa mō te toitūtanga. I whakatūria ia hei Executive Director o Greenpeace Aotearoa i te marama o Whiringa-ā-rangi i te tau 2015. I mua mai i tērā, he MP, he kaihautū hoki ia o te Pāti Kākāriki. I whānau mai a Russel ki Piripane, otirā, he nui tonu āna mahi ki roto i ngā kaupapa pāpori me ngā kaupapa taiao i mua i tōna hūnukutanga ki Aotearoa i te tau 1997. Mai anō i taua wā, kei te kōkiri tonu ia i ngā take taiao. Kei te noho ia ki Tāmaki Makaurau i te taha o tōna hoa pūmau rātou ko ā rāua tamariki tokotoru. Whāia a Russel ki Twitter
Tui Warmenhoven – Heamana o te Poari
I whakangungua a Tui hei rōia, ā, e 20 tau ia e mahi ana hei kairangahau ā-iwi. Kua tata pau i a ia ngā tau e rua hei kaiwhakahaere mō te poari o Te Runanganui o Ngāti Porou, arā, ko te poari tērā e whakahaere ana i te whakataunga Tiriti o Ngāti Porou. Ko āna kaupapa mahi, ko te mahi whāomoomo, ko ngā take taiao, ko te mahi patu riha, ko ngā take hī ika, ko te whakahoutanga o ngā mahinga whenua me te whakarauoratanga mai o te takiwā o te awa o Waiapū i te kotahi rau tau. Hei māngai ia mō Ngāti Porou i waenga i ngā kaiwhakatau a te Kaunihera o Tūranganui-a-Kiwa e pā ana ki ngā mahinga whenua me ngā mahinga wai i te takiwā o te awa o Waiapu. He kaikōmihana a Tui, he Kaitiaki anō mō ngā hapū, ngā iwi me ngā hapori o Te Tairāwhiti. Ko te aronga nui o āna mahi rangahau, ko ngā take nui e pā ana ki te horonga me te tūkinotanga o te rohe o te Waiapu me ōna taonga katoa me ngā pānga kino o aua āhuatanga ki ngā koiora me te noho o te tangata. Kua whakatakotoria hoki e ia ngā mahere mō te whakahoutanga o ngā tūmomo mahinga whenua. Nōnātata nei, kua tahuri ia ki te paihere i te mātauranga Māori me te mātauranga pūtaiao ki te kimi rongoā mō ngā take e pā ana ki ngā huringa nui o te āhuarangi, e tiro atu ana ki ngā mahinga whenua, ki ngā whakaritenga mō ngā pānga kino o te huarere, mō te Adaptive Governance me ngā whakataunga e pā ana ki te taiao ki Te Tairāwhiti. He kaikirimana ia ki ngā momo CRI pērā i te SCION Forest Research, i a GNS me Manaaki Whenua. Tokowhā ngā tamariki a Tui. E hia tau a ia e tautoko ana i a Greenpeace ā-pūtea, ā-mahi hoki. Kei te noho ia ki tōna kāinga māori kei raro i te maunga o Hikurangi ki Ruatōrea.
Pania Newton
No Ngāpuhi, nō Te Rarawa me Waikato whānui a Pania Newton. E ngākaunui ana a Pania ki te reo Māori me ōna tikanga, ki te mahi kai me te whakatutukinga o ngā take ā-ture o tōna whānau, o tōna hapū me ōna iwi. Kei te noho a Pania ki Ihumātao, ki Māngere, ā, ka kuraina ki Te Kura Māori o Ngā Tapuwae. I haere ia ki Waipapa Taumata Rau, i reira ka riro i a ia tāna Tohu Paetahi mō te Ture me Health Sciences. I tēnei wā, kei te whai ia i tāna Tohu Paetahi mō ngā Tikanga Māori me Social Sciences e pā ana ki te Public Health. He nui tonu āna tohu mō te Māori Food Sovereignty Practices me ngā mahi a Te Whare Tapere mai i Te Awanuiārangi me Te Wānanga o Aotearoa. Nō tōna putanga atu i te whare wānanga, ka whakatū a Pania rātou ko ōna whanaunga i te Save Our Unique Landscape Campaign. Whāia, ka whakarērea e ia te ao Ture kia whakapaua e ia tōna oranga ki te whakapūmautanga me te whakamarumarutanga o Ihumātao – tō rātou whenua tūpuna. Nō te tau 2012, ka tū a Pania hei mema o Matike Mai Aotearoa Rangatahi e whai ana i te whakahoutanga o ngā whakahaere o te kāwanatanga o Aotearoa. He mema, he kaitiaki hoki a Pania i runga i te maha o ngā Rōpū Tiaki me ngā poari e whakakaha ana i ngā hapori ki te whai i ngā momo mahi hauora e whiwhi ai rātou ki te oranga nui.
Rahul Watson Govindan
He kaiwhakahaere matua a Rahul, kua mahi ia ki ngā whenua e waru, ā, kua 22 tau ia e mahi ana i te ao pakihi, i te ao hangarau, i roto anō i te rāngai tūmatanui me ngā hapori. Nāna anō ngā kamupene maha i whakatū, ā, kua tū ia hei kaiwhiri ki a UNICEF me Oxfam huri noa i te ao. I tēnei wā koia te CEO o Loomio, he kāhui SaaS ki Te Whanganui-a-Tara. I tēnei wā, he kaituku pūtea ia, he mema o ngā poari, he kaitohu hoki e pā ana ki ngā mahi rautaki, ki te whakatutukinga me te kounga o ngā whakahaere ā-tari ki Aotearoa, ki rāwāhi anō. E ngākaunui ana a Rahul ki ngā kaupapa whaitake e whakohooho ana i ngā ngā whakaaro o te tangata kia rerekē ngā mahi a ngā pūnaha whakahaere. Ko Rahul te Heamana o te Poari o Belong Aotearoa, He Kaitiaki o te United Nations Youth NZ, he mema anō o te Australian Institute of Company Directors. Kua whai mātauranga a Rahul ki Te Herenga Waka, ki te University of Amsterdam me Oslo University. Kua whakawhiwhia ia ki tētahi University Blue e Te Herenga Waka mō āna mahi whakahaere i te ao hākinakina (i te hōki), waihoki, he mema ia o te tīma hōki o NZ Masters.
Bill Sinclair
He mea whakahirahira te tū o Bill i roto i ngā mahi Whakahaere hei Systems Analyst, hei Chief Financial Officer, hei Pūkenga anō hoki i te roanga o te 50 tau. Kei a ia tētahi Graduate Diploma mō te Business and Industrial Administration, he Tohu Paerua mō te Pūtaiao (Hōnore) me te Pāngarau, he Tohu Paetahi mō te Pūtaiao me te Mātai Matū. He mea tono a Bill hei mema o te Poari o Greenpeace NZ i tēnei tau tonu i runga i tōna mātau ki te ahumoni me āna mahi ki te Finance Subcommittee me te Risk Committee. Kua piki ake anō tōna kaha ki te tautoko i te kaupapa o Greenpeace.
Emalani Case
He pūkenga a Emalani Case mō te Pacific Studies ki Te Herenga Waka. I roto i āna mahi hei kaimautohe Kanak Maoli, hei kaiako, hei kaituhi anō, kua ruku atu ia ki te hōhonutanga o ngā take pērā i ngā mōtika me te tū o ngā Iwi Taketake, i ngā mahi tāmi a tauiwi, i te whakawetewetenga o ngā here o te mahi tāmi me ngā mahi takakino ki runga i te taiao me te tangata. Kei te whakahaua ia e tōna tino hiahia ki te whakapakari i ngā hononga i waenga i ngā Iwi Taketake huri noa i Te Moananui-a-Kiwa, ki te whakapakari hoki i tō rātou tū hei ngā rā o anamata. Nāna te pukapuka o Everything Ancient Was Once New: Indigenous Persistence from Hawaiʻi to Kahiki i tuhi. Kua tau mai ia ki Aotearoa i Waimea, i Hawaiʻi.
Te Kawa Robb
He kaiwhakaako, he kaiwhiri, he kairangahau Māori, he kaituhi, he kaiwhakaahua hoki a Te Kawa Robb (nō Ngāti Awa, nō Ngāti Pūkeko, nō Ngāti Ranginui me Kotirana). E ngākaunui ana ia ki te whakapikinga ake o te ora o te taiao mā ngā whakawhitiwhitinga whai tikanga. Ko te hao o te ngākau o Te Kawa, ko āna mahi e hāpai ana i te rangatirangatanga o ngā whānau, o ngā hapū me ngā iwi ki runga i ā rātou kai, i ngā wai me te whenua kia pakari te tū o te hapori whānui, kia tutuki ngā kawenga o te kaitiaki mā te hauhake kai, mā te whakatipu me te kohi kai i raro anō i ngā tikanga a ō tātou tūpuna. Koa katoa ana a Te Kawa i tana kopounga ake ki te Poari o Greenpeace Aotearoa – kei te tū ia i runga i tōna mōhio ki te reo me te ao Māori me āna mahi i te taha o ngā NGO, o ngā tari kāwanatanga, o te hapori, o te ao pakihi me ngā hinonga pāpori.